ដោយ : មុនី (ថ្ងៃទី 9 វិច្ឆិកា 2009)

ភ្នំពេញ: លោក ថាក់ស៊ីន​ស៊ីណា​វ៉ាត អតីត​នាយករដ្ឋមន្ត្រី​សៀម​ដែល​ត្រូវ​បាន​ទំលាក់​ពី​អំណាច​ដោយ​រដ្ឋប្រហារ​យោធា​នា​ឆ្នាំ​២០០៦ ហើយ​ដែល​រដ្ឋាភិបាល​សៀម​របស់​អាប់​ភី​ស៊ីត​តាម​រករឿង​បំផុត​នោះ​នឹង​មក​កម្ពុជា​នៅ​ថ្ងៃ​ទី​១២​ខែ​វិច្ឆិកា​ខាង​មុខ​។​

​ ​តាម​ការបញ្ជាក់​របស់​សម្តេច​តេជោ ហ៊ុន សែន នាយករដ្ឋមន្ត្រី​កម្ពុជា​កាលពី​រសៀល​ថ្ងៃ​ទី​៨​វិច្ឆិកា​នៅពេល​ត្រឡប់មក​ពី​ប្រទេស​ជប៉ុន​បាន​អះអាង​ជា​សាធារណៈ​ថា លោក​ថាក់ស៊ីន ស៊ីណា​វ៉ាត នឹង​មក​កម្ពុជា​នៅ​ថ្ងៃ​ទី​១២​ខែវិច្ឆិកា ដើម្បី​ធ្វើ​បាឋកថា​មួយ​ទាក់ទង​ទៅនឹង​ផ្នែក​សេដ្ឋកិច្ច​ដែល​មាន​រយៈពេល​៣​ម៉ោង​។​សម្តេច​មិន​បាប​បញ្ជាក់​ពី​ពេលវេលា​នៃ​ការមកដល់​ច្បាស់លាស់​ទេ តែ​លោក​បាន​បញ្ជាក់ថា​លោក​ថាក់ស៊ីន​នឹង​មក​ដល់​នៅថ្ងៃនោះ​។​

​ ​នាយករដ្ឋមន្ត្រី​កម្ពុជា​បាន​បន្តទៀតថា​ការមកដល់​របស់​លោក​ថាក់ស៊ីន គឺ​ដើម្បី​បំពេញ​តួនាទី​ជា​ទីប្រឹក្សា​សេដ្ឋកិច្ច​របស់​រាជរដ្ឋាភិបាល​កម្ពុជា​តែ​ប៉ុណ្ណោះ​ដែល​សៀម​មិន​ត្រូវ​ភាន់ច្រឡំ​រឿង​នេះ​ទេ​។​

​ ​ទាក់ទង​ទៅនឹង​ការ​គំរាម​បិទ​ព្រំដែន​ដោយ​ភាគី​សៀម នាយករដ្ឋមន្ត្រី​កម្ពុជា​បាន​អះអាង​ថា កម្ពុជា​គឺជា​អ្នកដើរ​តាម​ការសំរេច​របស់​សៀ​ម​ទេ​។​បើ​សៀម​ចង់​បិទ​សូម​បិទ​ចុះ តែ​ត្រូវ​បិទ​ទាំងអស់​ទាំង​ទំនិញ​សៀម​ផង​។​មាន​នយ័​ថា​អ្វីក៏​មិន​អាច​ចូល​បាន​ទាំង​មនុស្ស ទាំង​ទំនិញ​។​សម្តេច​បាន​បន្តថា តាម​តួលេខ​ឆ្នាំ​២០០៨​ទំនិញ​សៀម​ចូលមក​កម្ពុជា​មាន​តំលៃ​ប្រមាណ​២០០០ លាន​ដុល្លារ​អាមេរិក រីឯ​ទំនិញ​កម្ពុជា​ចូល​ទៅ​សៀម​វិញ​ប្រមាណ​ត្រឹម​៩០​លាន​ដុល្លារ​ប៉ុណ្ណោះ​។​ដូចនេះ​ការបិទ​ព្រំដែន​តើ​នរណា​ខាត​? នរណា​ចំណេញ​?

​ ​សម្តេច​តេជោ ហ៊ុន​សែន បាន​និយាយថា សម្តេច​បាន​ធ្វើ​នយោបាយ​តាំងពី​ពេល​នេះ​លោក​អាប់​ភី​ស៊ីត នាយ​រដ្ឋមន្ត្រី​សៀម​បច្ចុប្បន្ន​នៅ​រត់​លេង​នៅ​ឡើយ​ទេ ។​សម្តេច​បន្តថា កម្ពុជា​អាច​បន្ត​កំដរ​សៀម​រហូតដល់​ពេល​ណា​ក៏បាន​។​

​ ​លោក ថាក់ស៊ីន ត្រូវបាន​រាជរដ្ឋាភិបាល​កម្ពុជា តែងតាំង​ធ្វើ​ជា​ទីប្រឹក្សា​ផ្ទាល់​សម្តេច​តេជោ​ហ៊ុន សែន​និង​ទីប្រឹក្សា​រាជរដ្ឋាភិបាល​ទទួលបន្ទុក​សេដ្ឋកិច្ច​កាលពី​ថ្ងៃ​ទី​២៧​ខែតុលា​កន្លងទៅនេះ ដែល​ការតែងតាំង​នេះ​បាន​ធ្វើឲ្យ​រដ្ឋាភិបា​លសៀម​ខឹងច្រឡោត​តោតតូ​ង​រហូត​ហៅ​ទូត​របស់​ខ្លួន​ទៅ​ប្រទេស​វិញ​។​-​